A Asociación Boirense de Empresarios (ABE) segue a achegarnos boas novas con este cambio de ano, logo dos ánimos subministrados ao remate do Nadal (o frutífero balance dos 80.000 rascas repartidos). Segundo nos conta a entidade, esta vén de incorporar un novo socio protector a través da figura da Clínica Dental Rebeca Ozores, emprazada no centro urbano de Boiro e ocupando un espazo de 200 m² dotado da máis moderna tecnoloxía e últimos avances en odontoloxía como TAC 3D, láser dental, cirurxía guiada por ordenador e sedación consciente.
En palabras da ABE, entre os puntos fortes da nova incorporación atópanse os esforzos despregados pola dirección da clínica para subministrar “un ambiente acolledor, cómodo e seguro”, onde se garante non só unha atención profesional, próxima e personalizada en todas as súas especialidades (odontoloxía xeral, implantoloxía oral, ortodoncia, odontopediatría, endodoncia, periodoncia e estética dental) senón tamén unha comunicación directa e próxima e máis unha experiencia de máis de quince anos de andaina e profesionalidades.
Con esta integración e coa renovación do compromiso dos resto de socios protectores, JEALSA Grupo JJ Chicolino, García Sanchez e España y Fernández, a ABE conta con 5 empresas con esta categoría.
A figura do socio protector
A xunta directiva da ABE, para “consolidar o crecemento sustentábel da entidade”, creou en 2016 a figura de socio protector, que son empresas ou entidades que queiran dar un paso adiante no apoio á patronal boirense conseguindo esta condición a través do cumprimento dunha serie de obrigas (sinatura de convenio de colaboración e aceptación das súas cláusulas) e que dan dereito a determinados beneficios como a inclusión destacada na sección específica da web www.abe.gal, a incorporación do seu logotipo en tódalas campañas e eventos que realice a ABE así como a presenza do mesmo nas roldas de prensa, cursos, charlas e conferencias.
A ABE expresou o seu agradecemento tanto a Clínica Dental Rebeca Ozores pola súa implicación como ao resto de socios protectores xa que “co seu apoio podemos afianzar e manter os servizos e actividades que desenvolvemos e impulsar novos proxectos”.
