Este mércores xulgan a unha parella por pagar por unha leira a un veciño de Ribeira oito euros en lugar de 90.000 cando estaba bebedo


A sección sexta da Audiencia Provincial da Coruña, con sede en Santiago, acolle este mércores o xuízo a dous sospeitosos de apremar a outro de Ribeira que estaba ebrio para que lles asinase un contrato que redactaran previamente de compravenda dunha leira de propiedade.

Os imputados, para os que o fiscal pide tres anos e medio de prisión, estipularon como prezo de compra a cantidade de 90.000 euros, facendo constar que llos entregaban nese momento. Con todo, pagáronlle oito euros.

Os acusados, matrimonio, presentáronse en setembro de 2007 no domicilio do terceiro, sito en Ribeira, onde, “aproveitándose da circunstancia de acharse este en estado de embriaguez, apremáronlle para asinar un contrato de compravenda dunha leira da súa propiedade, a cal adquirira por herdanza dos seus pais, sen que tal leira estivese rexistrada no rexistro da propiedade”.

O matrimonio levou o título de propiedade da leira (testamento) e, segundo o relato do fiscal, “dáse a circunstancia de que os acusados xa lle presentaron o contrato redactado, estipulando como prezo de compra a cantidade de 90.000 euros, facendo constar no mesmo ‘que os compradores entregan neste acto en billetes de curso legal”.

Con todo, “nunca se lle pagou tal cantidade, senón que lle entregaron nese acto 8 euros”, segundo recolle o escrito de acusación da Fiscalía.