Vinteún positivos na residencia de Ribeira tralo cribado realizado nas instalacións ribeirenses na xornada de onte, onde usuarios e traballadores recibiran a primeira dose do antídoto a semana pasada. Actualmente os afectados están en coarentena.
Onte informabamos en O Barbanza da infección de dúas persoas na residencia de maiores ribeirense. Os últimos datos indican que son xa 19 os residentes e dous traballadores os positivos.
Amais rexistrouse outro caso entre o persoal de traballadores do centro de maiores de Noia, pero ningún entre os residentes nos recintos radicados na comarca.
No resto de Barbanza a pandemia parece conterse. Así A Pobra mantén o mesmo número de contaxiados descubertos en dúas semanas, 37. No resto de municipios experiméntanse descensos, cinco baixan en Boiro (90), tres en Noia (52) e Rianxo (47), dous en Muros (30), e un en Porto do Son (36).
Sanidade informou de que hai dúas persoas con covid ingresadas no hospital comarcal do Barbanza en Oleiros. Estes dous contaxiados súmanse aos 89 que están a tratamento no CHUS e no HM A Rosaleda, e que marca o pico máis alto de hospitalizados nesta segunda onda, e sitúase moi preto do centenar.
Coas case 2.100 PCR realizadas na zona de influencia da xerencia compostelá permitiron descubrir 93 novos positivos, unha cifra moi similar á de altas que se deron na última xornada, 94. Segundo os datos de Sanidade, nestes momentos hai 1.453 persoas a tratamento, 11 máis que onte, e vólvense a marcar a cifra máis alta desta segunda onda.