O CONCELLO DE RIBEIRA PREVÉ DEDICAR 262.000 EUROS DO POS PROVINCIAL A AMPLIAR A ATENCIÓN DOMICILIARIA A PERSOAS DEPENDENTES.
Aparte de destinar 721.467,51 euros a obras e 102.721.467,51 euros á redución de débeda, o Concello de Ribeira tamén inclúe no Plan Provincial de Cooperación ás Obras e Servizos de Competencia Municipal (punto
que será sometido á consideración do pleno este martes) un total de
262.161,95 euros para á ampliación do servizo do fogar no municipio.
En concreto, esta contía adscríbese ao POS+ Adicional 1/2021, que,
de acordo co punto 12 das súas bases reguladoras, contempla unha
achega para facer fronte ao impacto económico e social do COVID-19
en materia de servizos sociais.
De saír aprobado, este aumento permitiría dedicar case un millón de
euros ao servizo de atención domiciliaria de persoas dependentes, ao
incorporar a devandita asignación do POS Social a outras contías
procedentes das aportacións da Xunta, gastos municipais e ingresos
por prezo público.
Cómpre lembrar que no apartado de obras o POS tamén contempla
actuacións en todas as parroquias: pavimentación, saneamento e
abastecemento en Braña do Muro (Aguiño), instalación de
saneamento e abastecemento no lugar de Lombas (Palmeira),
pavimentación, pluviais e saneamento nas rúas Chaprado e Ceboleira
(Corrubedo), instalación de rede de saneamento con pozo de bombeo
no lugar de Canabeiro (Oleiros), rede de pluviais en Outeiro (Artes),
pavimentación e renovación das redes de auga potable e pluviais na
rúa Luis Pimentel (Aguiño), pavimentación, pluviais e saneamento na
rúa da Chouza (Castiñeiras), saneamento, pavimentación e
abastecemento no lugar de Frións (Carreira), pavimentación da rúa
Rosalía de Castro dende o cruce de Marcial del Adalid ata o cruce da
rúa Irmandiños (Ribeira) e saneamento no lugar de A Cucheriza
(Olveira).
E como POS complementario: pavimentación e rede de pluviais
dende a igrexa parroquial de Artes ata o Museo do Gravado (Artes),
ampliación e renovación do parque infantil de Pedra Pateira (Ribeira),
instalación de rede de saneamento e abastecemento no lugar de
Sampedro (Palmeira), pavimentación do camiño Vilar-Vixán (Carreira)
e pavimentación e renovación da rede de auga potable e pluviais na
rúa Celso Emilio Ferreiro (Aguiño).
