O Concello de Boiro celebrou na mañá deste luns 25 de xaneira unha nova xuntanza semanal da Comisión de Seguimento da Evolución da COVID-19. Segundo se desprende da reunión, o municipio (que segue en nivel máximo de alerta), proseguirá co peche dos parques infantís, das instalacións municipais e das pistas deportivas. Soamente se permite o uso de instalacións deportivas ao aire libre para a práctica de deporte federado, cumprindo sempre coas especificacións das autoridades sanitarias.
Asemade, informouse na sesión de que os membros de Protección Civil realizan de xeito periódico a asistencia a persoas confinadas, para axudarlles coa recollida de lixo ou outras necesidades derivadas do departamento de Servizos Sociais. Do mesmo xeito, o departamento de Servizo Sociais coordina as solicitudes de alimentos para Cáritas, así como as Tarxetas Moedeiro de Cruz Vermella e os servizos de teleasistencia da Deputación Provincial da Coruña.
A Policía Local de Boiro continúa coa vixilancia e control da poboación para garantir que se cumpran as restricións decretadas. Durante a fin de semana interpuxéronse un total de 4 denuncias, debido ao mal uso da máscara, o incumprimento do toque de queda e a apertura non permitida dun local hostaleiro.
