Foi esta mañá do 15 de xaneiro cando tivo lugar, de xeito telemático, unha primeira toma de contacto da Comisión de Avaliación e Planificación do Futuro do Pazo de Goiáns por parte do Concello de Boiro. O obxectivo deste equipo de traballo e das xuntanzas realizadas periodicamente é traballar a prol da conservación, coidado e funcionalidade do inmóbel.
Na reunión telemática estaban presentes: o alcalde de Boiro, José Ramón Romero, o tenente de alcalde, Luís Ruiz; o arqueólogo municipal, o xerente da ABE, un xestor cultural, a xerente da mancomunidade Barbanza Arousa, un historiador local, docentes e investigadores da USC e un especialista en xardineira e botánica.
O que se pretende con esta comisión é que estean representados todos os ámbitos relacionados co pazo e a súa contorna, referíndonos con isto ao aspecto arquitectónico e construtivo, medioambiental, cultural e histórico, asociacionismo, turístico, empresarial, económico- financeiro e xurídico.
Pola súa banda o alcalde expuxo o porqué da necesidade de crear unha comisión de expertos que avalíe a viabilidade técnica, económica, social, cultural e medioambiental do Pazo e da finca de Goiáns para diferentes proxectos: “Temos claro que a veciñanza ten que desfrutar deste Pazo”. É por iso que o Concello de Boiro abrirá un proceso de participación cidadá, para que a veciñanza faga as súas achegas sobre os posíbeis usos do inmóbel para logo seren valoradas polos expertos en vindeiras comisións.