O Complexo Turístico de Albeida, na Serra de Outes (A Coruña), resultou recoñecido como o proxecto gañador do Premio de Arquitectura 2020 do Consejo Superior de los Colegios de Arquitectos de España (CSCAE). Obra dos arquitectos galegos Alfonso Salgado e Francisco Liñares, é unha aposta innovadora e revolucionaria pola sustentabilidade e a optimización de recursos, poñendo en xogo unha nova e relevante contribución ao “reequilibrio entre o hábitat urbano e o natural”.
En concreto, o xurado do Premio de Arquitectura destacou a “gran musicalidade e permeabilidade” que posúe o Complexo Turístico de Albeida en Outes: “Optimiza recursos de forma práctica xerando unha arquitectura posíbel e sustentábel”. Amais, destacouse que o conxunto “aproveita os recursos ao máximo e dá lugar a resultados óptimos de forma harmonizada”.
A decana do Colexio de Arquitectos de Galicia, Elena Ampudia, sinala que esta obra “é unha clara aposta pola sustentabilidade e a integración no complexo territorio galego. Polo tanto, é un merecido recoñecemento ao traballo ben feito, e desde o Colexio de Arquitectos de Galicia facemos noso o sentir do xurado”.
Un espazo privilexiado con vistas á ría de Muros e Noia
O Complexo Turístico de Albeida está situado nunha contorna privilexiada da ría de Muros e Noia, concretamente no concello da Serra de Outes. O proxecto integra a rehabilitación de tres edificacións tradicionais que, ata ese momento, foran residencia e estudio de gravación, coa construción de nove aloxamentos que respectan a vexetación do lugar e reforzan a historia do xa edificado.
Para logralo, os autores buscaron a intimidade de cada edificación (sen renunciar á perspectiva que se descobre entre as pólas das árbores da desembocadura do río Tambre, os montes do Barbanza, a vila de Noia e o nacemento da ría Muros-Noia) e definiron formalmente as diferentes edificacións “intentando unir a evolución caprichosa da vexetación co elemento racional dos edificios existentes”. Tamén apostaron por integrar o conxunto no bosque da contorna, harmonizando os volumes coas alturas das árbores e “buscando a unión entre o natural e o artificial”.
Desde o estudio gañador, Francisco Liñares valora que o Premio de Arquitectura 2020 é un impulso ao traballo que Salgado e Liñares Arquitectos vén realizando nos últimos anos. “Premiouse unha forma de traballar que non pon o acento na forma, que dialoga coas preexistencias, cunha vontade evidente de integración nun territorio moi complexo, profunda e sabiamente humanizado, e co feito construtivo como fío condutor de todo o proceso arquitectónico”, considera Alfonso Salgado.
Membros do xurado
O xurado do Premio de Arquitectura estivo formado polos arquitectos Toni Gironès, como presidente do xurado en representación do presidente do CSCAE; José Manuel Gallego Jorreto, Alberto Campo Baeza (Medalla de Ouro da Arquitectura 2019), Dolores Alonso, Elisa Valero, e a secretaria xeral de Axenda Urbana e Vivenda, Elena Simón.
