O Bloque Nacionalista Galego (BNG) vén de emitir un comunicado no que plasma a súa preocupación polo gromo de COVID-19 da Residencia de Maiores de Ribeira. No comunicado a agrupación tamén reflicte a súa inquietude pola situación nos concellos da nosa comarca, que pasan a estar no nivel máximo dentro dunha área sanitaria (a de Santiago-Barbanza) que é “das máis afectadas do país nestes momentos e onde tanto o número de casos positivos como o número de persoas hospitalizadas seguen a aumentar”, sinala o BNG.
O grupo nacionalista, con todo, pon o foco no Residencia de Maiores Domus Vi de Ribeira, onde se rexistrou un primeiro gromo unha semana despois de ser achegadas as primeiras vacinas ás súas usuarias e usuarios e logo de que fose quen de manterse, dende o mes de marzo pasado, sen ningún contaxio.
“Alén das persoas contaxiadas coñeciamos a nova desalentadora do falecemento de dúas das persoas residentes que foran trasladadas ao Centro Galego de Desenvolvemento Integral (CEGADI)”, comenta a deputada nacionalista, Rosana Pérez, que reflicte que “cos datos que facilita a Consellería de Política Social a residencia ten o terceiro gromo de COVID máis importante en afectación a residentes de toda Galiza”. Para Pérez Fernández a situación é “sumamente preocupante dende o punto de vista sanitario”.
A deputada rexistrou unha iniciativa parlamentar para que a Xunta “adopte todas cantas medidas sexan precisas para controlar o gromo de COVID-19” producido recentemente na residencia, incluída a súa intervención. Do mesmo xeito preguntará que causas baralla a Xunta da infección dun importante número de residentes despois de seren vacinados/as, se se están cubrindo as baixas do persoal que está contaxiado e que actuacións pensa desenvolver para previr novos contaxios.