O alcalde de Boiro dá a benvida ás persoas usuarias do curso telemático de xerontoximnasia de Cruz Vermella

O Concello de Boiro e a asemblea local de Cruz Vermella dispoñen dun convenio de colaboración para o desenvolvemento da política social e asistencial no municipio. O alcalde de Boiro, José Ramón Romero, deulle este xoves a benvida ás persoas usuarias do curso de xerontoximnasia que están realizando de xeito telemático unha das accións enmarcadas dentro do programa de colaboración (debido ás circunstancias sobrevidas da crise sanitaria, Cruz Vermella comezou a levar a cabo estas actividades a través de videoconferencia, ao non poder facerse de xeito presencial).

José Ramón Romero aproveitou a visita para coñecer as instalacións de Cruz Vermella no Centro Social de Boiro, que acaban de ser reformadas para mellorar a súa distribución e adaptalas ás necesidades actuais do servizo que a entidade presta á veciñanza para a promoción do benestar social e servizos asistenciais.