Os días pasados a Xunta de Galicia fixo entrega dos Premios Artesanía de Galicia 2020 que pretenden enxalzar os valores dun sector clave da identidade colectiva da Comunidade e se sitúa como unha das vías de preservación do patrimonio cultural e etnográfico. Na Comunidade agora mesmo existen preto de 700 obradoiros que traballan baixo a marca Artesanía de Galicia, entre eles o obradoiro Raposiñas da Pobra do Caramiñal, galardoado na cerimonia.
Loaira Pérez Pérez, co obradoiro Raposiñas de cerámica feita de vagar, gañou a Bolsa Eloy Gesto 2020, dotada de 4.000 euros para investir en formación especializada nun centro de prestixio. Deste xeito, a Xunta busca potenciar a “remuda xeracional no sector, o acceso de novos talentos á artesanía e a súa profesionalización”.
Cunha ampla formación artística en Belas Artes, restauración e xoiaría, Loaira Pérez creou en xullo de 2019 Raposiñas, que define como un obradoiro cerámico rural no que os conceptos marcan os deseños. Coa Bolsa Eloy Gesto terá a oportunidade de formarse no Cencal, Centro de Formación Profesional para a Industria Cerámica, en Caldas da Raínha (Portugal), así como na fábrica de cerámica portuguesa Bordallo Pinheiro, un referente internacional.
