Proseguen no concello de Porto do Son as obras para acondicionar rúas e mellorar espazos urbanos, a través de diferentes liñas de acción. Aparte dos traballos para reformar a contorna portuaria da vila sonense, iniciouse a obra para a humanizar a rúa da Fonte de Portosín, cun investimento de 99.522,50€. A superficie na que se está a centrar a actuación abrangue 414 metros cadrados. Trátase en boa medida achegar pavimentación integral e de eliminar os elementos que entorpezan o libre tránsito dos peóns, suprimindo barreiras e fochancas e optimizando o aspecto xeral da rúa e da súa contorna.
Por outra banda, o Concello anunciou a posta en marcha dos traballos para optimizar a contorna da igrexa de Miñortos, un proxecto que ten un orzamento de case 150.000€. Esta iniciativa consiste en dotar ao espazo no que asenta o templo de elementos que favorezan a accesibilidade e potencien a estética do conxunto, unha contorna de importante valor histórico e patrimonial, ao acubillar nun mesmo espazo a igrexa, o cruceiro e a casa reitoral.
