A Xunta vén de eliminar un punto de vertido de augas residuais en Esteiro, no Concello de Boiro.
Os técnicos do Plan de Control de Vertidos, desenvolvido por Augas de Galicia, identificaron o foco contaminante no marco de inspeccións rutineiras.
As analíticas efectuadas no punto amosaron a presenza de contaminación de orixe fecal nas augas que desaloxaba a rede á ría de Arousa, no entorno da praia da Ribeira Grande.
A problemática identificada foi posta en coñecemento do Concello de Boiro, ao que se lle solicitou a recondución dos aportes contaminantes cara á rede de saneamento.
Nunha recente visita levada a cabo na zona, os inspectores autonómicos verificaron o cese das emisións contaminantes a raíz das accións correctoras levadas a cabo por parte do Concello de Boiro.
