A actividade da hostalería queda limitada en Santiago, A Coruña e Ourense ata as 18,00 horas, pero no caso da capital galega –que ve ampliado o seu peche perimetral aos municipios de Teo e Ames– só poderán abrir as terrazas. Todas estas medidas publicaranse no Diario Oficial de Galicia de hoxe e entrarán en vigor ás 00,00 horas do sábado.
Santiago pasa ao nivel máximo de restricións, de forma que unicamente poderase servir en terrazas con grupos dun máximo de catro persoas. Pola súa banda, nos casos da Coruña e Ourense, a actividade reducirase ao 30% en interiores e ao 50% no exterior, tamén con máximos de catro persoas.
Por outra banda Galicia permanecerá pechada perimetralmente ata finais do mes de xaneiro, período no que se intensificará o control da fronteira co norte de Portugal ante a situación epidemiolóxica desta rexión do país luso. Trátase dunha das medidas acordadas no subcomité clínico para a xestión da pandemia en Galicia, que na súa reunión deste venres decidiu ampliar ata final de mes o peche perimetral da comunidade que estaba decretado ata o 11 de xaneiro.
O vindeiro martes haberá unha nova xuntanza, neste caso do comité clínico onde se poderían tomar novas medias na hostalería, ante a evolución da situación actual.
