O Concello de Boiro esta adherido ao plan de compostaxe domestica que promove a sociedade medioambiental SOGAMA e que ten como obxectivo estender as practicas de autocompostaxe nas vivendas do municipio para lograr unha xestión máis sustentábel. O Goberno boirense informou de que unha trintena de veciños das parroquias de Boiro e Lampón participan este ano neste programa. Tamén pon o foco nos beneficios desta práctica, que reduce a cantidade de materia valorizábel que se deposita no contedor xenérico (no municipio xéranse anualmente máis de 6.000 toneladas de residuos que van ao contedor xenérico, das cales un 40% son materia orgánica).
Este programa, impulsado pola Concellaría de Medio Ambiente do Concello de Boiro e promovido por SOGAMA, vén a dar continuidade ao que xa se levou a cabo o ano pasado nunhas trinta vivendas unifamiliares dos núcleos de Abanqueiro e Cespón e co que se pretende fomentar esta práctica nos fogares. A primeira experiencia deste programa “foi moi positiva”, explica o Concello, engadindo que “os trinta composteiros entregados deron servizo a un total de 86 persoas” e que “estes acubillos supuxeron un aforro na xestión entre 600 e 800 litros de desperdicio por familia ao ano”.
A entrega de composteiros estase a facer nestes dias as persoas inscritas no programa. Por motivos de seguridade debido a situación sanitaria na que se atopa o municipio, a entrega estase desenvólvese de xeito individual. As familias inscritas reciben información sobre o seu uso e, os técnicos, farán un seguimento do mesmo durante un ano.
O Concello lembra que quedan aínda caro composteiros dispoñíbeis para familias que aínda queiran participar no programa, que deben poñerse en contacto co departamento de Medio Ambiente do Concello de Boiro.
