A agrupación Rianxo en Común que coordina Julián Bustelo vén de emitir un comunicado de urxencia no que se pide a reactivación da actividade municipal rianxeira, poñendo o foco en iniciativas de vital importancia para a cidadanía e o concello que dependen das áreas de Comercio, Desenvolvemento Local e Urbanismo. En concreto, no comunicado faise un chamamento directo ao Goberno bipartito formado polo BNG e o PSOE para que impulsen medidas eficaces que fortalezan o comercio local (que para Rianxo en Común sofre unha crise que xa vén de antes da COVID, “xa que entre o 2012 e o 2018 perdeu o 14% das empresas que o integraban”) e que dean o empurrón definitivo ao PXOM e o Inventario de Camiños Municipais.
A agrupación lembra no comunicado que xa pasaron seis anos dende a aprobación inicial do PXOM e que o Inventario de Camiños Municipais foi aprobado inicialmente en abril do 2016. Tamén recorda que as dúas iniciativas son “dúas prioridades ineludíbeis e necesarias para dar seguridade xurídica aos veciños e veciñas que levan anos esperando pola aprobación final destes documentos”.
Rianxo en Común sinala que “xa van alá 9 meses dende que a pandemia do coronavirus alterou as nosas vidas e truncou as expectativas empresariais de moitos veciños e veciñas, unha pandemia que supuxo, nun primeiro momento, o peche de moitos establecementos e que se dispararan as cifras do paro no noso municipio”. Para a agrupación, o Goberno rianxeiro “e nomeadamente a responsábel de comercio deu as costas ao sector comercial e hostaleiro do municipio, e a diferencia de concellos da contorna, non adoptou nin unha soa medida para facer fronte ás perdas provocadas pola crise do coronavirus e para reactivar a economía”.
Rianxo en Común tamén critica que malia “que o Goberno anunciase unha partida de 40.000€ para cubrir os gastos derivados da instalación de medidas de protección nos establecementos do municipio mediante a concesión de axudas por un importe de 500€, o anuncio nunca se cumpriu”.
