Puño Puñete e Os golfiños e o xigante chegan a vindeira semana ao Elma (A Pobra)

A programación teatral para esta tempada de outono/inverno organizada pola Concellería da Cultura da Pobra do Caramiñal ofrece os vindeiros días as representacións teatrais de Puño Puñete e Os golfiños.

Os espectáculos dirixidos ao público infantil e familiar adscritas ao Nadal Cultural, terán lugar no Teatro Elma, o vindeiro martes e mércores. Así, Baobab Teatro con Puño Puñete abrirá o martes 22, ás 18:30 horas, cunha representación poética que promove a lingua galega, a través de palabras e música que rescatan ditos populares, refráns e poemas de Galicia.

Doutra banda, Os golfiños e o xigante, da man de Fantoches Baj, terá lugar o mércores 23, ás 18:30 horas. Trátase dun espectáculo de sombras chinesas que narra unha historia real extraída dunha nova que se fixo eco na prensa internacional.

As pezas teatrais serán representadas baixo as medidas implantadas por mor da COVID-19. Por iso, tódalas persoas que queiran asistir poderán facelo de balde con previa reserva na casa da cultura e xuventude Raquel Fernández Soler ou a través do teléfono de contacto 981831545.