Imaxe cedida por Antonio A. Torres
O Noia Portus Apostoli logrou seu sétimo triunfo da temporada logo de vencer na súa visita ao Talavera por 1-3. Un partido moi igualado que se resolveu no tramo final do encontro.
O Primero de Mayo acollía un encontro entre dous dos mellores conxuntos da categoría, algo que se deixaría ver dende o pitido inicial do árbitro. Ámbolos dous conxuntos mostráronse tímidos e respectando ó equipo que tiñan en fronte. Non sería ata o último minuto, e logo dun par de chegadas con perigo, cando Lluc aproveitou unha transición ofensiva para facer 0 -1 co que se chegaría ao descanso e poñer por diante ós noieses.
O segundo período comezou con máis ritmo, sobre todo polo conxunto local que comezou a apertar a saída de balón dos de Marlon Velasco. Froito desta atrevida decisión, chegou o empate no 4’ por medio de Pepe. Encontro empatado, e prevíase que quen marcara o seguinte gol contaría cunha gran vantaxe para levarse o encontro. Por sorte apareceu Pirata, para os noieses, no minuto 30 para anotar o 1-2 cun disparo dende fora do área e bater a Rafa Luque. O Noia FS aguantou o resultado pero sen deixar de buscar o gol da tranquilidade, que chegou no 39’ das botas de Antonio Diz, que puxo o definitivo 1-3.
Con este triunfo o Noia Portus Apostoli mantense no máis alto da táboa con 7 vitorias e un empate nas 8 xornadas disputadas ata o momento na Segunda División Subgrupo 1. Hoxe o cadro de Marlon Velasco recibirán nos oitavos de final da Copa do Rei ó Viña Albali Valdepeñas, actual subcampión da Primeira División e da Copa. O encontro terá lugar no Agustín Mourís a partir das 20:30 e será emitido a través de cmmplay.es.
