O espectáculo Polo Camiño, contos da feira será finalmente o día 19 no Cine Elma da Pobra

Xa hai nova data para o espectáculo Polo Camiño, contos da feira da compañía A Cova das Letras na Pobra do Caramiñal, logo de que tivese que ser adiado por cuestións alleas ao Concello. Será no Elma, o 19 de decembro, ás 19.00 horas. Trátase dunha proposta con monicreques de luva e de táboa e que se basea na tradición oral galega e mais noutras literaturas populares para narrar a historia dunha feira na cal conflúen seis personaxes.

Serán media ducia de persoeiros que, cos seus contos e cantos, farán voar a imaxinación do público: a fotógrafa minuteira, o fistor, Pepa a Loba, Pepa das Mulas, o vendedor de tarabelas e a posticeira.

Dáselle así continuidade ó programa de dinamización lingüística FalaRedes 2020, da Secretaría Xeral da Política Lingüística para a Rede de Dinamización Lingüística da Xunta (RDL), á cal o Concello da Pobra do Caramiñal pertence dende hai un ano a través do seu Servizo de Normalización Lingüística (SNL), adscrito á Concellaría da Normalización Lingüística, da cal é titular o edil Xabier Santos (BNG).

A actividade é de balde e apta para tódolos públicos. Seguiranse as medidas implantadas por mor da COVID-19, polo cal se aconsella a reserva previa da entrada a través do teléfono de contacto 676666263, ben sexa chamando ou por Whatsapp. A fin do prazo da inscrición é ás 16.00 horas do propio día do evento.