O Sergas continuará este martes coas probas, para o que a poboación será citada a través de SMS O cribado realizado polo Servizo Galego de Saúde durante a fin de semana en Boiro, ao que estaban chamadas unhas 3.500 persoas, alcanzou unha participación do 80 por cento, segundo datos da área Sanitaria de Santiago-Barbanza.
As PCR foron efectuadas polo persoal de enfermería do Servizo de Medicina Preventiva entre o venres e o domingo. En concreto, comezou o venres con profesionais da hostalería e continuou nos días sucesivos entre a poboación de entre 35 e 44 anos con tarxeta sanitaria na localidade. O cribado continuará a partir deste martes, cando serán chamados a participar o 20 por cento restante que non acudiu e máis persoas, tal e como indican fontes da área Sanitaria.
As probas levan a cabo en diferentes puntos, entre eles o centro de saúde de Boiro e o Hospital de Barbanza, en Ribeira, e teñen o obxectivo de localizar positivos por covid-19 asintomáticos. A poboación é citada a través dun SMS no que figurará a hora e a dirección á que deben acudir, así como un Código QR para a súa identificación persoal. A toma de mostras será nasofaríngea para realizar PCR, que será analizada pola técnica ‘ pooling’.
O Sergas decidiu acometer este cribado debido ao incremento dos contaxios de coronavirus no concello, que desde o sábado permanece coas restricións máis severas para facer fronte á pandemia, entre elas o peche perimetral.
