Coincidindo coa última erradicación colectiva de especias invasoras celebrada esta ano, esta fin de semana que vimos de deixar atrás, as Brigadas Deseucaliptizadoras de Verdegaia e a Fundación Montescola, con sede de operacións principal no medioambientalmente activista núcleo de Froxán (Lousame), fixeron balance das xeiras de traballo realizadas en 2020 nos montes galegos: diferentes recantos onde se desenvolveron rogas colectivas para erradicar eucaliptos ou acacias e se apostou de cheo por recuperar o bosque autóctono. Segundo fan saber no reconto, as brigadas foron quen se xuntar máis de 900 persoas voluntarias.
A xornada desta fin de semana celebrouse nunha zona da carballeira de Froxán, precisamente, onde participaron máis dunha vintena de deseucaliptizadoras e deseucaliptizadores en pequenos grupos, operando en media hectárea da dita carballeira.
Montescola e as Brigadas fan “un balanzo positivo do ano, a pesar das dificultades para realizar convocatorias e a necesidade de organizar as intervencións en pequenos grupos”. Mesmo así, engadiron, en 2020 fixéronse 15 intervencións sumando xa máis de 900 brigadistas participantes.
Así, fixéronse rogas en Froxán (Lousame), Corcubión, Valón (Ferrol), Montefaro (Ferrol), Coruxo (Vigo), Darbo (Cangas do Morrazo), O Hío (Cangas do Morrazo), Mondariz Balneario e Lentille (O Ribeiro). En Froxán, de feito, desenvolvéronse seis intervencións ao longo do ano en colaboración co Monte Veciñal do lugar e a Fundación Montescola.
As Brigadas volverán á carga no mes de xaneiro “se as circunstancias o permiten” cunha intervención no monte de Lentille (no Ribeiro), estando programadas novas xornadas para a plantación de árbores frondosas autóctonas en Cedeira, Ferrol e Lousame.
