O pasado 28 de novembro botaba a andar a campaña Raña e gaña no Concello da Pobra, co obxectivo de dinamizar a economía do municipio. Dende o seu inicio, a iniciativa xa leva repartidos arredor de 35.000 rascas e máis de 300 agasallos.
A proposta supón a distribución de máis de 70.000 tarxetas nos 71 establecementos comerciais e de servizos do termo municipal ata o día 6 de xaneiro, data na que remata a iniciativa.
Así, por cada dez euros de compra nos locais que toman parte desta campaña, entregarase un rasca, no caso de estar premiado, especificarán o establecemento onde recoller o agasallo. Doutra banda, no caso concreto das contribucións das empresas colaboradoras, a persoa agraciada deberá acudir co seu rasca á Oficina de Turismo.
A campaña acolle diferentes sectores do comercio local, tendas de roupa, alimentación, deportes, centros de estética, froitarías ou informática. Esta variedade supón unha gran heteroxeneidade á hora de repartir os agasallos: dende produtos alimentarios a un smartphone, pasando por ceras, tratamentos de beleza… En canto ás achegas por parte das empresa colaboradoras atópanse lotes de produtos, rutas en quad, menús ou viaxe familiar a Eurodisney. O período estipulado para recolle-los premios será ata o 28 de febreiro de 2021.
