Teatro do Atlántico representará Dúas donas que bailan no Elma da Pobra

O antigo cine Elma acollerá este domingo 15, ás 19.00 horas, a representación da obra Dúas donas que bailan, da man de Teatro do Atlántico. A dita peza ponnos na pel dunha muller maior e viúva e que soña cunha viaxe a París e que se resiste a abandonar o esfarelado piso en que habita, malia as presións dos fillos, con quen non mantén boa relación, e tamén da axencia inmobiliaria propietaria do inmóbel. Os problemas adquiren unha intensidade maior cando entra en xogo unha muller á que a familia encárgalle facer os labores domésticos na casa dúas veces por semana, profesora de Lingua e Literatura e obrigada polas circunstancias a aceptar traballo.

O seu carácter contestatario non ten nada que envexar se o comparamos co da vella, polo que cada xeira de traballo converterase nun continuo tirapuxa entre as dúas mulleres, que non poden evitar que abrollen ante o público os seus soños e fracasos, “nunha viaxe intensa, divertida e brutalmente conmovedora”, segundo fai saber a compañía responsábel do espectáculo.

As intérpretes son María Barcala e María Ángeles Iglesias. Na ficha técnica figura como autor Josep M.ª Benet i Jornet, dirección de Xúlio Lago, axudante de dirección Esther Carrodeguas e tradución de Aleixandre Lago.

Esta cita enmárcase na programación teatral para esta tempada outono/inverno organizada pola Concellaría da Cultura da Pobra do Caramiñal en colaboración coa Rede Cultural da Deputación da Coruña. A entrada é de balde e a actividade transcorrerá seguindo as medidas implantadas por mor da COVID-19, polo cal as persoas interesadas en asistir deben facer a súa reserva na Casa da Cultura e Xuventude Raquel Fernández Soler ou a través do teléfono de contacto 981 831 545.