Este venres 6 de novembro vaise celebrar no Auditorio de Rianxo a terceira edición do Memorial Mireya Dieste, unha actividade conmemorativo-musical (que rende homenaxe á sobriña do escritor local Rafael Dieste, que destacou pola súa traxectoria como intérprete de piano) organizada pola Irmandade de Música Galega e mailo Concello.
Ás 18.00 horas, no salón de actos, celebrarase a presentación do traballo doutoral A guitarra na Galiza, de Isabel Rei Samartim, e presentado por Alejo Amoedo.
Ás 20.00 horas, na Sala Arcos Moldes, celebrarase o concerto de piano Adalid a quatro maos, a cargo de Margarita Viso e Juan Durán, e presentado por Orjáis e Isabel Rei.
Para ambos actos hai prazas limitadas, pódese realizar a reserva de localidades para cada unha das propostas en auditorio@concelloderianxo.gal (preferente) ou no teléfono 664 183 217, do 2 ao 4 de novembro, de 9.00 a 13.30 horas, en días laborais.
A reserva será efectiva unicamente cando se confirme desde o Auditorio.
Mireya Dieste
Mireya Dieste, que morreu en 2015 aos cen anos, era sobriña do ilustre escritor Rafael Dieste, filla de Eduardo, un dos irmáns maiores do celebrado autor de A fiestra baldeira. Mireya-Magdalena, que residía en A Coruña, pasou boa parte da súa nenez en Rianxo e logo comezou un periplo polo mudo acompañada en primeira instancia polo seu pai, que era diplomático.
