O Concello de Ribeira informou do remate das actividades de formación culinaria do obradoiro de emprego O Pote, no que se adestraron nos fogóns, na Escola Municipal de Hostalería, quince alumnas e alumnos dende novembro do ano pasado. A conclusión das actividades de formación veu acompañada dun acto de clausura no Centro Cultural Lustres Rivas.
O acto contou coa intervención do delegado territorial de emprego da Xunta, Isidoro Martínez; da primeira tenente de alcalde María Sampedro e do concelleiro de Innovación e Promoción Económica Ramón Doval.
No transcurso da clausura puxéronse en valor os beneficios deste tipo de iniciativas “para aumentar a calidade dun sector tan importante para este municipio como é o culinario”. De feito, anunciouse que na semana entrante dará comezo outro obradoiro de emprego de cociña (denominado O Pote II) coa participación de quince novos alumnos-traballadores de entre 18 e 29 anos.
Tahume VI
Ademais, a tenente de alcalde anunciou a próxima formación doutro obradoiro de emprego organizado entre Ribeira e Porto do Son (de nome, Tahume VI, xa que é o sexto taller destas características compartido por ambos municipios) con especialidades en traballos en carpintería e con actividades auxiliares en conservación e mellora de montes. En total serán vinte persoas as que se formen neste obradoiro (dez e dez).
Tras a proxección dun vídeo resumo dos traballos elaborados ao abeiro de O Pote nas instalacións situadas no segundo andar do mercado (tales como demostracións gastronómicas, workshops ou confección de menús solidarios), os participantes realizaron unha fotografía de grupo en compañía do seu profesorado e respectando os protocolos antiCOVID.
