O Centro de Documentación Sociolingüística do Consello da Cultura Galega (CCG), co apoio da Secretaría Xeral de Política Lingüística, organiza a 22 edición dos Encontros para a Normalización Lingüística, un simposio que se vén desenvolvendo anualmente dende 1998 e que, de maneira moi participativa e baixo diferentes puntos de vista, aborda cuestión teóricas, prácticas e estratéxicas relacionadas cos procesos e as políticas de normalización das linguas, co foco posto na extensión do uso social da lingua galega.
Co título A integración lingüística como ferramenta de cohesión social, estea edición dos Encontros celebrarase este ano de xeito virtual, con mesas redondas transmitidas a través da web do Consello da Cultura Galega e da súa canle de Youtube os días 13 de novembro (emisión gravada do simposio), e 16 e 19 do mesmo mes (debates ás horas indicadas no programa).
A actividade permanecerá despois na Mediateca do Consello.
A convocatoria deste ano céntrase, en palabras da organización, “na integración lingüística como un factor indispensábel de cohesión social”. Avaliaranse recursos dispoñíbeis de integración e emprestarase unha atención especial ao sistema CELGA impulsado por Política Lingüística, por “ser este o sistema de formación que se ofrece desde a Administración autonómica e requisito para a integración laboral dos migrantes”.
