O Partido Barbanza Independente (PBBI), a través do seu portavoz Vicente Mariño de Bricio, presentou un rogo para ser debatido en pleno relativo ao proxecto da variante de Ribeira, unha iniciativa que, en palabras do concelleiro, está a xerar preocupación entre “boa parte da cidadanía”, e por este motivo foi levada a pleno na sesión do mes pasado, onde o PBBI, a través dunha moción, instou a que se estudasen diferentes alternativas á variante por un equipo de expertos.
O novo requirimento, explican os independentes, vén motivado “polo paso do tempo e polo temor de que sexa esquecida a resolución establecida no mes de outubro”. Nel, o PBBI pregunta cando se vai iniciar o proceso de selección do equipo de expertos, e tamén polas metodoloxías que se van empregar para o labor de elección.
Tamén mostran o seu interese por se será posíbel a participación da comisión de afectados nos procesos de selección, e, amais, se se comunicou á Xunta a resolución do pleno neste asunto e, de ser así, se foi adoptada algunha medida.
