O Concello de Porto do Son comezou este mes de novembro celebrando un novo fito en materia de comunicación dixital coa cidadanía, un ámbito en clara proxección mesmo antes da crise sanitaria (polo que ten de interactivo, cómodo, inmediato e participativo), e que colleu un impulso extra trala chegada da COVID. Segundo comunicou o Concello a través das redes sociais nas que ten presenza, a comunidade de lectoras e lectores do Facebook do Concello non fixo máis que medrar dende a súa posta en marcha e xa sei situou nos 7.000 membros.
A este fito cómpre engadir outro logro recente: o sitio do Concello en Porto do Son en Instagram, a rede social (e aplicación móbil) para compartir fotografías e vídeos, foi quen de superar os 3.000 membros.
Estas pegadas de Porto do Son no Facebook e no Instagram, tal e como destaca o Concello, son un proceso aberto que se nutre cada pouco de novas contribucións, ao que cómpre engadir o importante potencial que atesouran as parroquias do municipio como materia prima de gran calidade para as fotografías e os vídeos dos internautas.
