Este domingo o antigo cine Elma da Pobra do Caramiñal acolleu a representación do espectáculo Contos no Camiño, a cargo de Xurxo Souto, Beatriz Campos e un vello coñecido dos escenarios locais e da contorna: o autor, contador, dramaturgo e actor Quico Cadaval (Carreira, Ribeira, 1960). Foi a primeira das dúas actividades previstas este novembro na Pobra ao abeiro do programa de dinamización lingüística FalaRedes 2020, da Secretaría Xeral da Política Lingüística para a Rede de Dinamización Lingüística da Xunta (RDL), á cal o Concello pertence dende hai un ano a través do seu Servizo de Normalización Lingüística (SNL).
As persoas asistentes puideron desfrutar dunha función de narrativa oral e moito humor, onde o devandito trío de contadoras/es compartiron escenario cun guión inspirado no Camiño de Santiago, baseado en lendas e historias singulares.
Por outra banda, o Concello informa de que a compañía A Cova das Letras traerá ás 18.30 horas do 19 de novembro o espectáculo Polo Camiño, contos da feira, unha proposta para a cal se empregan monicreques de luva e de táboa e cuxo fío argumental baséase na tradición oral galega e máis noutras literaturas populares para narrar a historia dunha feira na cal conflúen seis personaxes que, cos seus contos e cantos, fan voar a imaxinación do público: a fotógrafa minuteira, o fistor, Pepa A Loba, Pepa das Mulas, o vendedor de tarabelas e a posticeira.
As actividades son de balde e aptas para tódolos públicos. Seguiranse as medidas implantadas por mor da COVID-19, polo cal se aconsella a reserva previa da entrada a través do teléfono de contacto 676 666 263, ben sexa chamando ou por Whatsapp. A fin do prazo da inscrición é ás 16.00 horas do propio día dos eventos.