O Bloque Nacionalista Galego de Ribeira demanda un maior número de zonas verdes e de lecer na cidade. A causa desta iniciativa é “a carencia de espazos con vexetación que existen a día de hoxe en Ribeira”, e que ten como principal obxectivo a mellora da calidade do aire e de vida dos veciños en tempos de pandemia nos que son imprescindibles os espazos amplos ó aire libre.
Esta proposta ven acompañada dun plan denominado “Reverdecer Ribeira”, que consiste en por en marcha unha renovación de diferentes zonas do casco urbano para crear eses desexados espazos verdes. O principal cambio que expón o BNG é a remodelación da fachada marítima ao longo da avenida das Carolinas. A reforma estriba na unión do carril bici de Coroso co do Touro, o aumento da superficie peonil e a reorganización dos estacionamentos, que provocaría unha nova disposición da zona, aumentando así as zonas verdes e de lecer.
O BNG ribeirense aproveitará as reformas programadas polo Concello na avenida das Carolinas para solicitar a plantación de árbores. Dende a sede nacionalista reclaman árbores de medio e gran porte, así como un aumento no número de árbores plantados ó redor do casco urbano e parroquias.
