O Concello de Porto do Son segue adiante este outono co seu traballo a prol da xestión responsábel e sustentábel de residuos, unha liña de actividade que se complementa con iniciativas para fomentar entre a cidadanía a sensibilización arredor do tratamento ecolóxico dos refugallos. O Goberno local informou de que o vindeiro 3 de novembro realizarase un dispositivo de recollida a domicilio de material RAEE, que son as siglas que engloban os residuos electrónicos e eléctricos (material informático, electrodomésticos de todo tipo e tamén pilas, baterías e demais).
O Concello explica que se trata dun servizo cen por cen de balde, no que o único que se precisa é chamar ao teléfono 981 867 412. Na actividade, impulsada pola Concellería de Medio Ambiente, terán cabida todos os enseres que decote se engloban baixo as sigas RAEE: televisores, computadores, teléfonos, ferramentas eléctricas, lámpadas eléctricas, instrumentos de vixilancia de control, aparellos médicos, xoguetes eléctricos, videoxogos, lavadoras, neveiras, microondas, deshumidificadores, encimeiras, máquinas expendedoras, cronómetros deportivos, secadoras, ventiladores, estufas eléctricas, quentadores eléctricos e tamén cascallos e restos de obras de traballos domésticos (en sacas de até 100 quilogramos).
