A compañía Ibuprofeno Teatro segue facendo recaladas nos nosos concellos coa súa representación teatral O mel non caduca. Desta volta, a cita será na Casa da Cultura de Boiro, este 13 de novembro ás 21.00 horas. O Concello explica que as entradas (limitadas) poden conseguirse no mesmo día do espectáculo a partir das 17.00 horas.
O mel non caduca é unha comedia teatral para público adulto no que se fai unha lectura crítica e humorística da nosa relación cos obxectos que, polas presións da industria e os seus interese, acaban morrendo antes de tempo (iso que se vén chamando obsolescencia programa e que deixa en moi mal lugar aos electrodomésticos actuais con respecto aos que tivemos a sorte de usar en décadas pasadas). O mel non caduca, que tamén é unha ollada sobre os hábitos que nos levan dereitiños á destrución do planeta, está dirixida por Santiago Cortegoso e conta no seu elenco con Maríán Bañobre e Avelino González.
Seguindo co programa cultural de Boiro desta primeira metade de novembro, lembrar que o sábado día 14 ás 17.00 horas, no Centro Social de Cabo de Cruz, vaise celebrar unha representación teatral a cargo do Capitán Garfo, que presentará o espectáculo Cociñando música. Trátase dunha peza para publico infantil e familiar que inclúe un concerto de pop electrónico onde “un particular Capitán Garfo prepara un nutritivo e divertido menú musical co que a rapazada aprende de forma sinxela e motivadora uns bos hábitos alimentarios, a importancia dun almorzo saudábel, a poñer a mesa ou a facerse amigos e amigas das verduras”.
Reserva de entradas no enderezo electrónica reservacultura@boiro.gal ou no 981 84 78 59 ata as 13.00 horas no 13/11/2020.
