A asemblea cidadá Boiro Novo, a través da súa concelleira Dores Torado e no marco das actividades relacionadas coa celebración deste 25-N, presentou unha moción con vistas a constituír o que sería unha mesa local de coordinación insterinstitucional fronte á violencia machista.
Segundo explica a plataforma boirense, a proposta ten a súa orixe na marxe que deixan aberta as leis orgánicas 1/2004 e 11/2007 que recoñecen o ámbito municipal, “pola súa proximidade á cidadanía e polo coñecemento das situacións específicas da poboación”, como “o idóneo para o desenvolvemento das accións tendentes a garantir a igualdade entre mulleres e homes e da prevención e erradicación da violencia de xénero”.
En palabras de Boiro Novo a mesa “sería un instrumento operativo no que estarían representados todos os axentes do municipio implicados, directa ou indirectamente, na loita contra a violencia machista co obxectivo de procurar unha maior eficacia na resposta ante esta lacra social”.
A mesa, indica a agrupación, estaría composta por representantes dos Servizos Sociais e persoal técnico do Centro de Información á Muller (CIM)), da Policía Local e da Garda Civil, do ámbito sanitario, dos centros educativos, dos xulgados de violencia de xénero así como dos diversos colectivos feministas e de mulleres do concello. Amais, o réxime ordinario da convocatoria deberá ser alomenos de carácter semestral, con xuntanzas extraordinarias e/ou de urxencia sempre que a situación o requira.
