As e os demandantes de emprego dos concellos de Outes, Lousame e Noia van poder beneficiarse nos meses vindeiros dun obradoiro en xestión forestal impulsado polo Goberno galego e centrado en achegar recursos de utilidade sobre conservación e mellora de montes. O taller, concibido para unha vintena de alumnos, terá a súa sede de operacións en Outes. A Xunta contribuirá con 347.000 euros ao seu desenvolvemento, ao que cómpre engadir 16.500 euros para incentivar a contratación en empresas da contorna das persoas participantes.
Durante nove meses o alumnado recibirá a formación teórico-práctica prevista nos certificados de profesionalidade, alternándoa co desenvolvemento de traballos consistentes na mellora de masas arbóreas, rozas, podas ou reforestación. As actividades prácticas levaranse a cabo en diferentes recantos forestais dos tres municipios.