A conselleira de Economía e Industria, María Jesús Lorenzana, visitou este martes 3 de novembro a sede da Asociación de Empresarios de Ribeira (AER), onde mantivo un encontro coa alcaldesa de Ribeira, María Sampedro, e cun grupo de empresarios, co obxectivo de avaliar os avances na tramitación do futuro polígono industrial do concello.
Lorenzana explicou que “xa se adxudicou a actualización do proxecto de urbanización que permitirá desenvolver este ámbito e dotar de máis solo empresarial ao concello”. Deste xeito, lembrou que a previsión da Xunta é comezar este ano co proceso de licitación das obras de construción do novo parque que terá case 260.000 m2 de superficie.
Segundo expuxo, trátase de adaptar o proxecto que xa existía ás necesidades reais de execución e aos criterios técnicos e económicos que rexerán a posterior licitación das obras; e facilitar ademais, unha coordinación maior entre a redacción do proxecto, a contratación das obras e a súa futura execución. Esta é unha das actuacións incluídas nos 4,2 millóns de m2 que están agora mesmo en tramitación, urbanización ou execución na provincia da Coruña.
