Esta fin de semana tivo lugar a terceira edición das xornadas A Pobra do Caramiñal no Tempo, que afondou na historia, cultura e patrimonio da vila. A iniciativa, xurdida fai catro anos, inaugurouse o sábado 28 con catro conferencias. “Este evento é un éxito tras éxito, demostra o interese que ten a xente por coñece-lo patrimonio, valoralo e desfrutalo”, afirmou Xosé Lois Piñeiro, alcalde de A Pobra. A Concellaría da Cultura foi a encargada de organizar o programa baixo unhas medidas protocolarias por mor da COVID-19.
Logo da presentación do programa de actividades por parte do alcalde, Manuel Gago, xornalista e profesor na Universidade de Santiago de Compostela, procedeu co primeiro coloquio: Mitos e lendas da Pobra do Caramiñal. Unha charla que tratou o que reside no imaxinario, o “patrimonio inmaterial que nos conecta moitas veces con tempos moi remotos”.
De seguido, Antonio González, director do Museo Valle-Inclán, expuxo A Igrexa de Santa Cruz de Lesón: 15 séculos de historia. O protagonista resaltou “o curioso que é como cambia a historia. Lembramos a parroquia máis antiga da Pobra do Caramiñal e unha das máis antigas da comarca do Barbanza”.
Tras un descanso, o historiado Anselmo López mostrou “a dialéctica política e económica dos grandes poderes que van a ter presenza na zona”, con Conflitos de poder na Baixa Idade Media no Caramiñal.
Rafael García, profesor na Universidade de Santiago de Compostela, cerrou a rolda de conferencias con Xullo de 1936 na Pobra do Caramiñal. Ademais recompilou no traballo Nomes e Voces a cifra de veciños afectados durante a Guerra Civil e posteriormente. Tamén quixo lembrar a existencia dun campo de concentración no municipio.
Tralo remate do acto, os asistentes foron agasallados co póster “As lendas do río das Pedras”, do ilustrador Miguel Robledo. A terceira edición das xornadas A Pobra do Caramiñal no Tempo puxo punto e final coa visita, o domingo 29, á igrexa de Santa Cruz de Lesón, cruceiro de San Amaro, A Aldea Vella, mosteiro de San Xoán da Misarela, barca de San Amaro e capela da Virxe do Monte.