Cómpre apoiar, agora máis ca nunca, o libro galego e os establecementos tradicionais onde se distribúen. Esta importante mensaxe foi recalcada este venres, Día das Librarías, polo conselleiro de Cultura, Román Rodríguez, e máis o secretario xeral de Cultura, Anxo Lorenzo, durante a súa visita á Libraría Aenea de Santiago, onde coincidiron na necesidade de seguir xuntando forzas, dende todas as frontes, para impulsar a reactivación do sector.
Durante a súa visita, Román Rodríguez salientou a “fonte de riqueza e de orgullo” que supón o sector do libro e agradeceu “o tremendo esforzo, imaxinación e sacrificio” que están a facer todas as librarías por ofrecer actividades de calidade e que sexan seguras para todo o mundo. Neste sentido, o conselleiro lembrou que a Xunta de Galicia vén de resolver unha liña de axudas para que estas poidan sufragar as actividades que veñen realizando de xeito presencial nos seus establecementos, así como actos de difusión dos libros e a lectura a través da súas páxinas webs ou redes sociais.
As ditas axudas, dixo, “súmanse ás medidas postas en marcha no Plan de reactivación para o sector cultural que, no seu conxunto, conta cunha achega de máis de 26M€”.
