O Servizo Marítimo Provincial da Garda Civil incautouse de 1.997 quilos de sardiña, especie que actualmente se atopa en veda, no porto da localidade de Portosín, en Porto do Son. Segundo a benemérita a incautación ocorreu cando efectivos desta unidade realizaban na zona un servizo de vixilancia para a prevención de pesca e marisqueo ilegal.
Os axentes observaron como un pesqueiro partía do porto para faenar e constataron que”desconectaba intermitentemente o sistema “AIS”, destinado á localización e seguimento dos buques. Nese momento comezaron a controlar os movementos da embarcación e comprobaron que apagaba este dispositivo no momento de regreso da faena, cando procedía a descargar no peirao.
A Garda Civil aproximouse ao pesqueiro para a súa inspección, na que achou entre as capturas un total de 1.996,7 quilos de sardiña e procederon á súa incautación e á tramitación das correspondentes denuncias non só por infraccións á lei galega de pesca, senón tamén á lexislación da Mariña Mercante por desconectar o sistema ‘ AIS’. O patrón da embarcación permanece como investigado como presunto autor dun delito contra a flora e a fauna. As sardiñas foron entregadas a unha institución benéfica.
