As persoas autónomas e as microempresas do concello de Porto do Son poderán beneficiarse das axudas do programa PEL-Reactiva acabadas de convocar pola Deputación da Coruña. No caso do Son, estamos a falar de máis de 140.000 euros de contía total para contribuír á recuperación do tecido produtivo do municipio no contexto actual da crise sanitaria e as súas graves consecuencias para o tecido empresarial. Da devandita contía total, case 30.000 vén da man do Concello. O prazo para solicitar as axudas remata o 25 de novembro ás 14.00 horas.
Poderán ser solicitadas por autónomos, autónomas e microempresas que se viran afectadas polo peche do negocio durante o Estado de Alarma, así coma aquelas que viran reducida a súa facturación en máis dun 75% ou se acolleran a un ERTE como consecuencia da situación de crise sanitaria orixinada pola COVID-19.
Os fondos poderán ser destinados, entre outras cuestións, a gastos de adaptación e acondicionamento dos negocios á nova realidade derivada da pandemia como pode ser a compra de mamparas de protección, a adquisición de produtos hixiénicos e de limpeza, material antiséptico ou desinfectante, así como a gastos correntes de subministracións de auga, luz, gas, etc.
