A Deputación destinará ao Barbanza preto de 2 millóns de euros para axudar ás persoas autónomas e as microempresas

20 Outubro 2020

A Deputación da Coruña vai destinar 12,5 millóns de euros para apoiar as persoas autónomas e as microempresas afectadas pola COVID-19, favorecendo (entre outras cousas) a adquisición de novas ferramentas tecnolóxicas que impulsen e consoliden a súa dixitalización. A contía canalizarase a través do programa PEL-Reactiva, no que colaboran 88 dos 90 concellos de menos de 50.000 habitantes, que serán os encargados de xestionar as solicitudes. As axudas, que serán de entre 1.500 e 3.000 euros, foron dadas a coñecer os días pasados polo presidente da Deputación da Coruña, Valentín González Formoso, o vicepresidente, Xosé Regueira, e o deputado responsábel da área de Emprego, José Ramón Rioboo.

Pola nosa comarca, todos os concellos confirmaron a súa participación directa na iniciativa.

No caso de Rianxo, o programa vén cun orzamento de 161.791 €, dividido do seguinte xeito: 129.433,49 € achegados pola entidade provincial e 32.358,37 € fornecidos polo Concello.

No caso de Boiro, o programa mobilizará 334.029,73 euros, dos cales 66.805,95 proveñen da Administración local.

No que atinxe a Lousame, o total será de 31.095,12 euros, dos que preto de 6.300 teñen a súa orixe no Concello.

No caso de Noia, estamos a falar dunha contía de 304.635,1 euros, dos que case 61.000 teñen orixe local.

No que respecta a Outes, prevese unha mobilización de máis de 97.000 euros, dos que preto de 20.000 serán fornecidos pola Administración local.

Na Pobra, as persoas autónomas e as microempresas disporán de 157.662,03 euros para seren distribuídos en axudas. Deles, 31,532 teñen procedencia no Concello.

No que atinxe a Porto do Son falaríamos de 140.899,82 euros, sendo 28.179,96 euros o achegado pola Administración local.

Polo que respecta a Ribeira, a contía total será de 463.268,88 euros, sendo 92.653,78 o aportado polo Concello.

O total, incluíndo Muros, Carnota e Mazaricos, será de 1.941.259,36 euros.

Un plan ambicioso

“Estamos ante o plan máis ambicioso presentado en Galicia para axudar aos autónomos a facer fronte ás consecuencias económicas orixinada pola COVID-19”, afirmou Valentín González Formoso, que quixo agradecer a “importante colaboración dos concello, xa que a Deputación achega o 80% do financiamento e son as administracións locais as que completaran os seus propios fondos co 20% restante”.

Pola súa banda, o vicepresidente, Xosé Regueira, incidiu tamén “na capacidade de adaptarnos á realidade, renunciando a algunhas apostas políticas que tiñamos proxectado para este ano”, pero “mantendo todas as liñas que supoñen creación de emprego e o nivel de investimentos nos concellos”.

Rioboo explicou que as axudas aos autónomos/as e microempresas tramitaranse a través dos concellos e que oscilarán entre os 1.500 euros para traballadores por conta propia sen traballadores ao seu cargo e os e os 3.000 euros aos que poden optar as empresas de entre 6 e 9 traballadores. As axudas serán compatíbeis con outras prestacións municipais.

Poderán acollerse ás axudas do PEL Reactiva os autónomos e microempresas que se viran afectadas polo peche durante o Estado de Alarma, así coma aquelas que viran reducida a súa facturación en máis dun 75% ou se acolleran a un ERTE.

Os gastos subvencionábeis serán a adquisición de material (elementos antisépticos ou desinfectantes, produtos hixiénicos e de limpeza), arrendamentos e canons (arrendamentos de maquinaria, vehículos, locais ou instalacións), reparacións e conservacións, primas de seguros e subministracións (auga, gas, combustíbeis, electricidade).

Outros artigos

Rosana Pérez reclama máis solo industrial na comarca do Barbanza

A deputada do BNG Rosana Pérez vén reclamar no Parlamento máis superficie industrial para O Barbanza, ao tempo que lembrou a “escaseza clamorosa” de solo empresarial en Barbanza Arousa, onde os catro parques empresariais existentes (Ribeira, A Pobra, Boiro e Rianxo)...

+

Xoves regresa o sol e sobe a temperatura

Galicia irá quedando durante o xoves baixo influencia anticiclónica. Con esta situación, agárdanse bancos de néboa matinais en zonas de interior, que darán paso a ceos con poucas nubes en xeral. As temperaturas mínimas terán un lixeiro descenso, mentres que as máximas...

+

Publicidade

Revista en papel

Opinión

“España no va como un cohete”. José Castro López

“España no va como un cohete”. José Castro López

La Comisión Europea eleva al 2,1 por cien el crecimiento del Producto Interior Bruto(PIB) en 2024, cuatro décimas por encima de pronósticos anteriores, prevé que Españacumplirá el objetivo del 3 por cien del déficit que exigen las reglas fiscales, espera quecontinúe...