A organización da Pont-Up Store, a feira pontevedresa de emprendemento e espírito innovador, confirmou estes días que o seu programa presencial celebrarase en primavera (agardando por “datas máis seguras” para habilitar a habitual carpa de emprendementos na praza de España) e que unha das súa ramificacións principais, o encontro de talento Pont-Up Exprés, converterase este ano nun evento en liña. Celebrarase o 19 de novembro e contará coa presenza activa da firma boirense JEALSA.
A transformación do formato presencial do Talent Business Pont-Up Exprés nun evento online materializarase o vindeiro 19 de novembro entre as 19.30 e as 20.30 horas. A sesión será retransmitida a partir dun escenario virtual onde 8 novas firmas innovadoras galegas presentarán en 5 minutos cadanseus proxectos a representantes de importantes empresas e entidades galegas. Nesta edición contarán con Margarita Hermo Figueira, directora da Asociación Galega de Empresa Familiar e responsábel de Relacións Institucionais da corporación empresarial conserveira JEALSA; Emilio Bruquetas Serantes, director xeral do grupo enerxético galego REGANOSA Holdco; Ángel González Calvo, presidente executivo da compañía internacional especializada en iluminación, sinalización e mobiliario urbano, SETGA que xunto con Virginia Pozo Castro, fundadora, directora executiva e creativa da firma de moda internacional Coosy, representan a internacionalización de empresas con base e orixe en Pontevedra.
Ao igual que o ano pasado, as presentacións serán abertas ao público e haberá tempo para a réplica por parte do público asistente. As empresas que presentarán os seus emprendementos a este comité de expertos son The Good Shop, Anainas Skin Peace, Vivegreens, Ertha Surfboards, Smartwood, Versos de A Ruda, O Galpón Lab e A Factoría do Lume.
O Pont-Up Store está liderado polo Campus CREA de Pontevedra (Universidade de Vigo) co Concello de Pontevedra como patrocinador principal; e o apoio da Deputación de Pontevedra, que se suma á colaboración de case 40 entidades públicas e privadas que durante estes sete anos foron sumando o seu respaldo.
