A mancha marítima de fuel dun quilómetro e medio de longo e catrocentos de ancho da que falamos onte dende O Barbanza, localizada á altura de Ribeira e desprazándose cara a mar aberto, está ser obxecto dun importante operativo de contención e limpeza por parte das administracións estatal e galega. Supervisando os labores, aínda activos, atópase o Ministerio de Transportes, Mobilidade e Axenda Urbana (MITMA), a través da Capitanía Marítima de Vilagarcía de Arousa, da Dirección Xeral da Mariña Mercante. O traballo do MITMA coordinouse cos efectivos despregados pola xunta, a través do Servizo de Gardacostas de Galicia, que activou nun primeiro intre o Plan Territorial de Contaminación Mariña Accidental de Galicia (Plan CAMGAL) en situación 2, é dicir, o nivel medio de emerxencia.
Participaron nas tarefas os buques Irmáns García Nodal e Paio Gómez Chariño e as patrulleiras Punta Falcoeiro e Punta Roncadoira con persoal do Servizo de Gardacostas, sumándose aos efectivos de Salvamento Marítimo do Estado, entre os que se incluíu o Salvamar Sargadelos ou o buque de salvamento Don Inda, que se mantivo durante toda a noite na bocana sur da ría poñendo freo ao espallamento dos hidrocarburos.
Segundo informou o MITMA, que activou seguidamente o Plan Marítimo Nacional (emerxencia 1), a mancha de fuel era onte pola noite do tamaño duns 15 campos de fútbol, e fóra detectada ao redor das 14.00 horas polo avión de SASEMAR 102 cando se atopaba en fase de recoñecemento.
Este martes pola noite procedeuse á instalación de medidas de contención e de limpeza na zona afectada co obxectivo de que a mancha non chegue á costa. Capitanía Marítima está a investigar a posíbel orixe do derrame mediante a análise da mancha, a súa localización e tipoloxía. Durante a noite mantívose o dispositivo de limpeza na zona e renováronse as operacións de recollida ao amencer.
