Este outono o Proxecto Ríos e a asociación ecoloxista ADEGA organizaron a XIII Limpeza Simultánea Móllate polos ríos, que este ano celebrouse en 49 concellos de toda Galiza, incluído o de Rianxo, onde tivo que ser adiada a quedada xeral do domingo 27 de setembro para ser retomada este sábado 10 de outubro.
A cita contou coa colaboración do voluntariado rianxeiro, do colectivo Fousas ao Monte e do Goberno local, que puxeron o foco, coma noutras ocasións, na limpeza de refugallos no río Te. Como resultado da súa xeira de traballo foron retirados todo tipo de materiais contaminantes, por exemplo un motor, unha roda e moreas de plásticos e papeis.
O Proxecto Ríos, cuxa nova xornada de traballo desenvolveuse en medio centenar de concellos da nosa xeografía, é un programa de Educación e Voluntariado Ambiental que ten “a finalidade de dar a coñecer o importante papel dos cursos fluviais, amosar as súas problemáticas así como fomentar iniciativas que permitan á cidadanía o mantemento e a mellora dos ríos proporcionando as ferramentas que garantan a súa participación”. Este proxecto é iniciativa de ADEGA e está promovido e financiado por Augas de Galicia, organismo que pertence á Consellería de Infraestruturas e Mobilidade, co apoio de Concellos como o de Rianxo ou de entidades como Fousas ao Monte.
