O Concello de Porto do Son organizou o pasado xoves 22 unha relevante actividade a prol da inclusión: un obradoiro de iniciación á lingua de signos que se desenvolveu nunha sesión de catro horas na Casa da Cultura local e baixo as máis estritas medidas de seguridade anti-COVID (máscara obrigatoria, prazas limitadas e distanciamento). O curso veu da man do departamento de Benestar Social, en colaboración coa Escola Galega de Saúde para Cidadáns, dependente da Consellería de Sanidade.
Participou no mesmo arredor dunha ducia de persoas, pertencentes, principalmente, aos ámbitos da educación, a sanidade e os coidados, aínda que a sesión tamén foi dirixida á cidadanía en xeral. Foi un obradoiro de balde no que se trataron conceptos prácticos e tamén teóricos (trazos característicos da cultura e identidade xorda, barreiras de comunicación, o modelo curricular Lingua de signos española).
