O Concello de Boiro creou un equipo de traballo multidisciplinar de expertos para analizar os aspectos técnicos, económicos, sociais, culturais e ambientais do Pazo de Goiáns e a súa contorna, a día de hoxe en fase de rehabilitación por parte do Goberno local. A Comisión de Avaliación e Planificación do Futuro Pazo de Goiáns estará formada por persoas representativas de diversos ámbitos, como son o xurídico, o arquitectónico, o medioambiental, o cultural e histórico, asociacionismo, turístico, económico e empresarial.
O obxectivo principal desta comisión é “decidir os futuros usos do inmóbel unha vez rematen as obras de restauración, tendo en conta as especificacións que recolle o convenio asinado entre o Concello de Boiro e o Ministerio de Cultura para a súa adquisición e tamén as propostas da veciñanza”, tal e como afirma o alcalde, José Ramón Romero, engadindo que a histórica construción estase poñendo en valor para “uso e desfrute de todos os cidadáns de Boiro”, polo que “queremos coñecer tamén a súa opinión”. Segundo fixo saber, “as instalacións son de todas as veciñas e veciños, polo que o mellor é que elas e eles fagan tamén as súas propostas”.
O comité estará formado por persoal técnico municipal e por persoas expertas de diferentes áreas. Tendo en conta as valoracións realizadas tanto polo arquitecto municipal como polo arqueólogo municipal, estase a confeccionar a listaxe de persoas representantes de cada ámbito na comisión, co obxectivo de convocalos a todos e dar os primeiros pasos en canto a futuros usos e aproveitar todas as posibilidades que ofrece.
“O Pazo de Goiáns e toda a súa finca teñen un potencial grandísimo a nivel cultural, arquitectónico, medioambiental, histórico, turístico… e queremos sacarlle o máximo partido”, recoñece o alcalde.
