O Concello de Boiro segue a dar pasos en materia de seguridade sanitaria, desta volta, coincidindo co recente inicio do curso, poñendo o foco nos centros escolares. Segundo informou o Goberno local, o comezo da tempada escolar estase a acompañar co reparto de máscaras reusábeis entre todo o alumnado dos centros educativos do termo municipal. A concelleira de Educación, María Outeiral, visitou na mañá deste mércores 7 de outubro todos os centros para entregar as máscaras e reunirse cos equipos directivos dos mesmos e coñecer de primeira man como se está levando o inicio do curso.
“Os equipos directivos transmítennos que os rapaces e rapazas están tendo un comportamento exemplar á hora de cumprir con todas as medidas de seguridade. O profesorado está facendo un gran traballo en todos os niveis por que o alumnado poida seguir coas clases con normalidade”, comentou a edil, quen acudiu aos centros acompañada do concelleiro de Xuventude, Marcos Fajardo, para entregar as máscaras aos equipos directivos. “As máscaras que lles entregamos pódense reusar, para que sexa o propio profesorado quen as xestione en función das necesidades do alumnado”, engadiu.
Aproveitaron a súa visita aos colexios para verificar en que estado se atopan os centros despois das tarefas de reforma e acondicionamento que se realizaron durante todo o verán, da man do Concello. Tamén quixeron coñecer as necesidades pendentes e poder facer unha planificación das actuacións a levar a cabo. “Seguimos traballando en conxunto o Concello, os centros educativos e as ANPAs pola mellora e coidado dos centros de ensino do municipio”, informou a concelleira.
