A Área de Cultura do Concello de Rianxo compartiu con nós a súa axenda cultural para a terceira fin de semana de outubro, unha axenda puntual que comeza o 16 de outubro, na Sala Arcos Moldes do Auditorio, coa celebración dun concerto do cantautor de Cuntis Manoele de Felisa. A actuación está prevista para as 21.00 horas e a entrada será de balde, con previa reserva en auditorio@concelloderianxo.gal ou no teléfono 664 183 217, do 05 ao 14 de outubro, de 09.00 a 13.30 horas, en días laborais.
Un día máis tarde no mesmo escenario do Auditorio de Rianxo, o 17 de outubro, temos unha cita co baile da man da compañía de danza Entremans, que ofrecerá na vila o seu espectáculo Gaia, unha proposta artística que xunta diferentes linguaxes e códigos (voz, danza, pintura, música, audiovisual) para facernos descubrir “o poder e a beleza do noso planeta e dos seus tesouros naturais”). A función será o 17 de outubro ás 19.00 horas. Está destinado a un público infantil e familiar, para nenos e nenas maiores de 3 anos. A entrada é de balde e pode obterse na devandita conta de correo e no mencionado número de teléfono, en horario de mañá.
Estas propostas forman parte do programa Rede Cultural da Deputación da Coruña.
