O Concello de Lousame organiza esta fin de semana dúas actividades dirixidas á poboación infantil do termo municipal. Por unha banda, temos unha experiencia de escapismo e aventura (unha escape room) baseada nunha das novelas de Harry Potter. Isto será o día 17 de outubro, sábado. Pola outra celebrarase un concerto de Uxía Lambona e a Banda Molona, o domingo 18. En palabras do Concello, trátase de dous espectáculos gratuítos pero “de aforo limitado debido á COVID-19”. Por esta causa, os veciños e veciñas que desexen asistir a algún deles deberán reservar a súa entrada na Casa da Cultura de Lousame (981 825 780).
Respecto á actividade baseada en Harry Potter, a concelleira de Cultura, Silvia Agrafojo, explica que “será unha escape room”, unha das actividades de lecer “máis puxantes nestes momentos entre o público novo”. A dinámica, comenta, consistirá en situar ás persoas participantes nun espazo cunha decoración inspirada na novela Harry Potter e o cáliz de lume, onde “terán que axudar ao novo mago a fuxir desa habitación na que está atrapado a través da resolución de distintos enigmas”.
Para facilitar a participación do maior número de rapaces e rapazas de Lousame, o Concello organizará tres sesións: ás 17.00, 18.00 e 19.00 horas. A actividade terá unha duración de 45 minutos e celebrarase na Casa da Cultura, coincidindo coa conmemoración do Día da Biblioteca 2020. A cita vén da man do Concello de Lousame en colaboración co programa Ler conta moito da Xunta de Galicia.
Concerto infantil
O domingo 18 de outubro, ás 18.00 horas, celébrase o concerto infantil Astronauta sideral, do grupo Uxía Lambona e a Banda Molona. Para aumentar o aforo, o concerto non terá lugar no auditorio da Casa da Cultura senón no Polideportivo Municipal Pilar Barreiro Senra, ata onde poderán achegarse un máximo de cen persoas. Astronauta sideral é o terceiro disco desta banda musical infantil nacida no ano 2014 e que ten como obxectivo facer cantar e bailar a todos os nenos e nenas que se acheguen ao polideportivo lousamiá.
Como nos seus anteriores traballo, o equipo de Troula Animación SL achegará á rapazada de Lousame unha selección de música tradicional galega dun xeito atractivo e divertido, cambiando as letras e os estilos musicais, mesturándoos con intervencións cómicas, mascotas e outras sorpresas.
