O Club Náutico Arousa Norte, con sede na Pobra do Caramiñal, organiza este outono, entre outubro e decembro, a segunda edición da Regata Alca, contando co patrocinio da firma compostelá que dá nome ao evento deportivo. Este consta de catro mangas distribuídas nos días 17 e 31 de outubro, 21 de novembro e 12 de decembro. A primeira manga consistirá nun percorrido costeiro de entre 10 e 15 millas con saída prevista para as 14.00 horas deste sábado. As previsións indican nubes e claros con vento de compoñente sur de 10 nós.
Segundo nos conta a organización, na liña de saída, instalada nas inmediacións da dársena pobrense, veranse as caras os cruceiros da clase ORC, representando á totalidade dos clubs náuticos da nosa ría e algún da veciña Ría de Pontevedra.
As seguintes etapas consistirán tamén nun percorrido costeiro, pero dependendo das condicións meteorolóxicas, a organización expón realizar algunha proba de tipo barlovento-sotavento e outra en modalidade inversa.
Os barcos máis regulares en todas as probas serán os que leven ás súas vitrinas o título desta regata que xa na anterior edición reuniu na liña de saída a unha quincena de embarcacións.