Comezaron en Rianxo esta semana as obras de instalación dun ascensor no edificio da Clínica Vella. Os traballos, adxudicados por un importe de 55.465,09 euros e cun prazo de execución de tres meses, están a ser despregados pola empresa Obras Gallaecia.
O proxecto forma parte do Plan Único da Deputación da Coruña e o Concello de Rianxo. O ascensor, informa o Goberno local, dará servizo a tres andares da antiga edificación que albergará servizos municipais (o obradoiro de emprego Clínica Vella, locais de ensaio para a mocidade) e, na parte superior do edificio, o Instituto Social da Marina.
O obxectivo é “resolver os problemas de accesibilidade que afectaban aos centos de beneficiarios e afiliados do mar que tiñan o seu centro de referencia de atención nestas oficinas”. A obra inclúe a instalación dun ascensor exterior independente para facilitar o acceso a cada un dos andares do inmóbel.
