O Concello de Boiro presentou este venres 9 unha iniciativa directamente encamiñada a impulsar a recuperación produtiva trala grave crise derivada da pandemia de COVID19. Estamos a falar do plan Boiro Reactiva-T, que inclúe subvencións directas para a pequena e mediana empresa e máis investimento público e proxectos para fomentar o emprego no municipio. Na presentación interviron o alcalde, José Ramón Romero, e o concelleiro de Comercio e Industria, Marcos Fajardo, que estiveron acompañados do presidente da Asociación Boirense de Empresarios (ABE), Daniel García, e das persoas encargadas das diversas partes do plan.
Segundo informaron Boiro Reactiva-T inclúe tamén unha serie de medidas económicas e fiscais dirixidas ao comercio e empresariado que viu reducida a súa actividade a consecuencia da COVID-19. Con esta finalidade, vaise poñer en marcha unha oficina municipal de reactivación económica e social, para “ofrecer á cidadanía información e axuda específica”, explicaron, engadindo que unha parte fundamental da reactivación económica e social “é a formación para o emprego”, que entronca cos programas de capacitación que desenvolve o Concello esta tempada no Centro de Formación e Viveiro de Empresas de Espiñeira. No mesmo lugar hai servizos a disposición do emprego e o emprendemento, como o programa de coworking Emprende Lab Barbanza.
Ademais de todas estas medidas, o Concello de Boiro vai lanzar unha liña de axudas directas a pemes e autónomos, gracias a unha subvención da Deputación Provincial da Coruña por un valor superior aos 330.000 euros.
